చోలే మసాలాతో కుల్చా తింటే ఆ రుచే వేరు! చాలామంది నాన్, కుల్చా ఒకటే అనుకుంటారు, కానీ వీటి తయారీలో చాలా తేడాలు ఉన్నాయి. ఈస్ట్ ఉన్నా లేకపోయినా, ఇంట్లోని పెనంపైనే హోటల్ స్టైల్ కుల్చాలను ఎలా సిద్ధం చేయాలో ఇప్పుడు తెలుసుకుందాం. ఉత్తర భారతదేశంలో పుట్టిన కుల్చా, నేడు ప్రపంచవ్యాప్తంగా ప్రాచుర్యం పొందింది. ముఖ్యంగా పంజాబీ సంప్రదాయ వంటకాల్లో దీనికి ప్రత్యేక స్థానం ఉంది. ఇది ప్రధానంగా మైదా పిండితో తయారవుతుంది.
కావలసిన పదార్థాలు:
మైదా పిండి
పెరుగు, బేకింగ్ సోడా, బేకింగ్ పౌడర్
కొద్దిగా పంచదార, ఉప్పు
వెన్న లేదా నెయ్యి
నువ్వులు లేదా కొత్తిమీర (గార్నిష్ కోసం)
తయారీ విధానం:
పిండి కలపడం: మైదా పిండిలో పెరుగు, బేకింగ్ సోడా, పౌడర్, కొద్దిగా నూనె వేసి మెత్తగా కలుపుకోవాలి. పిండి ఎంత మృదువుగా ఉంటే కుల్చా అంత ఫ్లఫీగా వస్తుంది.
కలిపిన పిండిని కనీసం 1-2 గంటల పాటు పక్కన పెట్టాలి. దీనివల్ల పిండి బాగా ఉబ్బి, కుల్చాలు మెత్తగా వస్తాయి.
మీకు కావాలంటే ఉడికించిన బంగాళదుంపలు, పనీర్ లేదా ఉల్లిపాయ ముక్కలతో మసాలా సిద్ధం చేసుకుని పిండి ముద్దల మధ్యలో ఉంచవచ్చు.
పిండిని గుండ్రంగా ఒత్తుకుని, ఒక వైపు నీటిని పూయాలి. వేడి పెనంపై నీరు ఉన్న వైపు వేస్తే అది పెనానికి అతుక్కుంటుంది. ఆ తర్వాత పెనాన్ని తిరగేసి నేరుగా మంటపై కాల్చాలి.
బాగా కాలిన కుల్చాపై వేడివేడి వెన్న రాస్తే రుచి అద్భుతంగా ఉంటుంది.
నాన్ కుల్చా మధ్య తేడా:
చాలామంది నాన్, కుల్చా మధ్య కన్ఫ్యూజ్ అవుతుంటారు. నాన్ తయారీలో ఈస్ట్ తక్కువగా వాడతారు, కొన్నిసార్లు గుడ్డు కూడా కలుపుతారు. కానీ కుల్చా పూర్తిగా పంజాబీ సృష్టి. ఇందులో బేకింగ్ సోడా/పౌడర్ ఎక్కువగా వాడటం వల్ల ఇది మరింత తేలికగా, మెత్తగా (Fluffy) ఉంటుంది.