తండ్రి నీడలో పెరిగే కొడుకుకు అడుగుడుగునా తండ్రి ప్రవర్తనే ఒక పాఠం. ఆడవారిని గౌరవించడం నుంచి, అపజయాలను తట్టుకోవడం వరకు.. ఒక తండ్రి మాత్రమే తన కొడుకుకు నేర్పించగలిగే విలువలు ఎన్నో ఉన్నాయి. ఒక బాధ్యతాయుతమైన వ్యక్తిగా, ఉత్తమమైన తండ్రిగా తన కొడుకును తీర్చిదిద్దే ఆ 10 సూత్రాలు మీకోసం. ఒక తండ్రి తన కొడుకుకు చెప్పే పాఠాలు మాటల ద్వారా కంటే, తన జీవన శైలి ద్వారానే ఎక్కువగా అందుతాయి. అవే ఒక కొడుకును రేపటి పౌరుడిగా తీర్చిదిద్దుతాయి.
1. మహిళలను గౌరవించడం: ఒక తండ్రి తన భార్యను, తల్లిని సోదరిని ఎలా చూసుకుంటాడో గమనించే కుమారుడు, మహిళల పట్ల గౌరవంగా మెలగడం నేర్చుకుంటాడు.
2. అపజయాలను తట్టుకోవడం: జీవితంలో గెలుపు మాత్రమే కాదు, ఓటమి కూడా ఎదురవుతుందని, ఆ సమయంలో కుంగిపోకుండా తిరిగి ఎలా నిలబడాలి అనేది తండ్రి తన అనుభవాల ద్వారా నేర్పిస్తాడు.
3. కుటుంబ బాధ్యత: కుటుంబ అవసరాలను తీరుస్తూ, వారిని రక్షించే తండ్రిని చూసి పెరిగే కొడుకు, సహజంగానే బాధ్యత గల వ్యక్తిగా మారుతాడు.
4. కష్టపడే తత్వం: నీతిగా, నిజాయితీగా సంపాదించే డబ్బు విలువను తండ్రి నేర్పిస్తాడు. కష్టపడితేనే ఫలితం ఉంటుందని తన పనుల ద్వారా నిరూపిస్తాడు.
5. భయాన్ని జయించడం: సవాళ్లు ఎదురైనప్పుడు పారిపోకుండా, ధైర్యంగా ఎలా ఎదుర్కోవాలో తండ్రి నేర్పిస్తాడు. తండ్రి చేయి పట్టుకుంటే వచ్చే ధైర్యం మరెక్కడా దొరకదు.
6. ఆర్థిక క్రమశిక్షణ: డబ్బు సంపాదించడం ఒక ఎత్తైతే, దానిని ఎలా ఆదా చేయాలి, ఎక్కడ ఖర్చు చేయాలి అనే ఆర్థిక నిర్వహణ పాఠాలను తండ్రి నుంచే నేర్చుకోవాలి.
7. మాట మీద నిలబడటం: ఇచ్చిన వాగ్దానాన్ని నిలబెట్టుకోవడం ఒక పురుషుడికి ఉండాల్సిన ఉత్తమ లక్షణం. తన ప్రవర్తన ద్వారా ‘మాట తప్పకూడదు’ అనే విలువను తండ్రి నేర్పిస్తాడు.
8. కోపాన్ని అదుపులో ఉంచుకోవడం: సమస్యలు ఎదురైనప్పుడు నిదానంగా ఉండటం, భావోద్వేగాలను నియంత్రించుకోవడం ఎలాగో తండ్రి పరిణతి నుంచి కొడుకు గ్రహిస్తాడు.
9. స్వయం గౌరవం నిజాయితీ: ఎవరి ముందైనా తల వంచకుండా, ఆత్మగౌరవంతో, నిజాయితీగా బ్రతకడం ఎలాగో తండ్రి నేర్పిస్తాడు. ఆ తల ఎత్తుకుని నడిచే గర్వం తండ్రి వల్లే వస్తుంది.
10. త్యాగం చేయడంలో ఉన్న గొప్పతనం: తన ఆశలను పక్కన పెట్టి కుటుంబం కోసం తండ్రి చేసే త్యాగాలను చూసి, ప్రేమ అంటే కేవలం తీసుకోవడం మాత్రమే కాదు ఇవ్వడం కూడా అని కొడుకు తెలుసుకుంటాడు.