ఉదయం లేవగానే ఒక కప్పు వేడి టీ పడకపోతే చాలామందికి రోజు గడవదు. అలసటను దూరం చేయడానికి, మనసుకు ఉల్లాసాన్ని ఇవ్వడానికి టీ ఒక అమృతంలా పనిచేస్తుంది. అయితే, మీరు తాగుతున్న ఆ టీ నిజంగానే టీ ఆకులతో తయారైందా? లేదా కేవలం టీ అనే పేరుతో మార్కెట్లో అమ్ముతున్న ఇతర మిశ్రమాలా? ఈ విషయంలో భారత ఆహార భద్రతా ప్రమాణాల సంస్థ (FSSAI) తాజాగా ఒక సంచలన ప్రకటన చేసింది. అసలైన టీ అంటే ఏమిటో, ఏ మొక్క నుంచి వచ్చిన ఆకులను మాత్రమే టీ అని పిలవాలో స్పష్టమైన నిబంధనలను విడుదల చేసింది. ఈ వార్త ఇప్పుడు టీ ప్రియుల్లో, ముఖ్యంగా హెర్బల్ టీలు తాగేవారిలో పెద్ద చర్చకు దారితీసింది. ప్రభుత్వం ప్రకారం అసలైన టీకి ఉండాల్సిన ఆ లక్షణాలు ఏంటో ఇప్పుడు వివరంగా తెలుసుకుందాం..
టీ అంటే కేవలం అది మాత్రమే..
ఎఫ్ఎస్ఎస్ఏఐ తాజాగా ఇచ్చిన వివరణ ప్రకారం.. ‘కామెల్లియా సైనెన్సిస్’ అనే మొక్క నుంచి సేకరించిన ఆకులను మాత్రమే అధికారికంగా ‘టీ’ అని పిలవాలి. మనం సాధారణంగా తాగే బ్లాక్ టీ, గ్రీన్ టీ, వైట్ టీ, ఊలాంగ్ టీ వంటివన్నీ ఈ ఒక్క మొక్క నుంచే తయారవుతాయి. కేవలం తయారీ విధానంలో ఉండే తేడాల వల్ల వాటికి వేర్వేరు రంగులు, రుచులు వస్తాయి. ఈ మొక్క ఆకులతో సంబంధం లేకుండా మార్కెట్లో దొరికే ఇతర పానీయాలను ‘టీ’ అనే పేరుతో పిలవడం లేదా లేబుల్ చేయడం సరైనది కాదని ప్రభుత్వం స్పష్టం చేస్తోంది. దీనివల్ల వినియోగదారుల్లో ఉన్న గందరగోళాన్ని తొలగించాలని సంస్థ భావిస్తోంది.
మరి మనం రోజూ తాగే చామంతి టీ, తులసి టీ లేదా ఇతర హెర్బల్ టీల పరిస్థితి ఏంటి? అనే సందేహం మీకు రావచ్చు. వాస్తవానికి వీటిని టీ అని పిలవకూడదని, ఇవి కేవలం ‘ఇన్ఫ్యూషన్స్’, మూలికా పానీయాలు మాత్రమేనని నిపుణులు చెబుతున్నారు. వీటిలో ‘కామెల్లియా సైనెన్సిస్’ ఆకులు ఉండవు కాబట్టి వీటిని టీ కింద పరిగణించలేము. కేవలం టీ అనే పేరు మీద ఉన్న క్రేజ్ను వాడుకోవడానికి కంపెనీలు వీటికి కూడా టీ అని పేరు పెట్టి అమ్ముతున్నాయి. ఇకపై ఇలాంటి పానీయాల ప్యాకెట్ల మీద ‘టీ’ అనే పదాన్ని వాడే విషయంలో కఠినమైన రూల్స్ వచ్చే అవకాశం ఉంది. అలాగే టీ పొడిలో ఎలాంటి రంగులు, ఇతర అనవసరమైన పదార్థాలు కలపకూడదని కూడా ప్రభుత్వం ఆదేశించింది.
ఈ కొత్త నిబంధనల వల్ల వినియోగదారులకు అసలైన నాణ్యమైన టీ పొడి లభించే అవకాశం ఉంటుంది. టీ ఆకుల ముసుగులో విక్రయించే నకిలీ ఉత్పత్తులకు దీనివల్ల చెక్ పడుతుంది. టీ ఆకుల్లో ఉండే సహజ సిద్ధమైన రసాయనాలు, యాంటీ ఆక్సిడెంట్లను దృష్టిలో ఉంచుకుని ఈ వివరణ ఇచ్చారు. అసలైన టీకి ఉండాల్సిన నాణ్యత ప్రమాణాలను కంపెనీలు ఖచ్చితంగా పాటించాల్సి ఉంటుంది.
ఒకవేళ కామెల్లియా సైనెన్సిస్ ఆకులతో పాటు ఇతర మూలికలను కలిపి విక్రయిస్తే, దానిని ‘ఫ్లేవర్డ్ టీ’గా మాత్రమే పేర్కొనాలి. దీనివల్ల మీరు కొనేది టీ ఆకులా లేక కేవలం మూలికలా అనే విషయం పక్కాగా తెలుస్తుంది. ప్రభుత్వం ఇచ్చిన ఈ వివరణతో ఇకపై టీ మార్కెట్లో పెను మార్పులు రాబోతున్నాయి. మీరు కొనే టీ పొడి ప్యాకెట్ మీద ఇకపై ఆ ప్లాంట్ పేరు ఉందో లేదో గమనించడం మర్చిపోకండి. ఆరోగ్యకరమైన టీని ఎంచుకోవడం వల్ల శరీరానికి అవసరమైన పోషకాలు అందుతాయి.