టాలీవుడ్ సీనియర్ హీరోయిన్ రోజా ఇటీవల ఓ ఇంటర్వ్యూలో రోజా తన వృత్తి, వ్యక్తిగత జీవితానికి సంబంధించిన అనేక ఆసక్తికర విషయాలను పంచుకున్నారు. తన రియాలిటీ షో పరంజ్యోతి విజయ రహస్యం నుంచి అభిమాన నటి శ్రీదేవి వరకు, మహిళలకు స్ఫూర్తిదాయక సందేశం వరకు పలు అంశాలపై ఆమె మాట్లాడారు. తన రియాలిటీ షో పరంజ్యోతి గురించి మాట్లాడుతూ, అది రెండు రకాలుగా తనకు ప్లస్ అయిందని రోజా చెప్పారు.
రాపిడ్ ఫైర్ రౌండ్‌లో రోజా తన ఆల్-టైమ్ అభిమాన హీరో సూపర్‌స్టార్ కృష్ణ అని, తాను ఆయనతో తెలుగు వీర లేవరా, ఎన్‌కౌంటర్, వైభవం, సంభవం వంటి అనేక సినిమాలు చేశానని వెల్లడించారు. తన అభిమాన నటి శ్రీదేవి అని చెబుతూ, “ఆమె అద్భుతమైన అందగత్తె. ఏ పాత్ర అయినా , గ్లామరస్ లేదా హోమ్లీ , ఆమె అద్భుతంగా చేయగలరు” అని అన్నారు.
వసంత కోకిల చిత్రంలో శ్రీదేవి మెంటల్‌ రిటార్డెడ్‌ పాత్రను చాలా క్యూట్‌గా, ముద్దుముద్దుగా చేశారని, అలాంటి పాత్ర చేయలేకపోయాననే వెలితి తనలో ఉండిపోయిందని రోజా పంచుకున్నారు. తనకు అంతులేని చీరల కలెక్షన్ ఉందని, ఒకట్రెండు సార్లు కట్టిన చీరలను తన స్నేహితులకు, బంధువులకు ఇస్తుంటానని రోజా చెప్పారు. డబ్బు వస్తే మొదట చీరలే కొంటానని తెలిపారు.
తన అభిమాన ఆహారం నాన్-వెజ్‌లో క్రాబ్, ఫిష్ కర్రీ కాగా, వెజ్‌లో పులిహోర అంటే తనకు అమితమైన ఇష్టమని పేర్కొన్నారు. చిన్నప్పటి నుంచి పులిహోరను ఎంతగానో ఇష్టపడతానని, రాధా యాత్ర సినిమా షూటింగ్ సమయంలో కేవలం పులిహోర మాత్రమే తిన్నానని రోజా గుర్తు చేసుకున్నారు. తన ఇష్టదైవం ఒక్కరు కాదని, తన పూజగదిలో అందరూ ఉంటారని, అన్ని పండుగలు చేస్తానని రోజా వివరించారు.
ప్రపంచంలోనే అత్యంత అందమైన మహిళ తన తల్లి అని రోజా చెప్పారు. కుటుంబం కోసం ఆమె చేసిన త్యాగాలు, క్రమశిక్షణతో కూడిన జీవితం తనకు ఎంతో నేర్పిందని, తాను జీవితాన్ని ప్రణాళికాబద్ధంగా జీవించడానికి తన తల్లి స్ఫూర్తి అని పేర్కొన్నారు. మహిళలకు తన సందేశాన్ని ఇస్తూ, ఆత్మవిశ్వాసం అత్యంత ముఖ్యమని, ఇతరులు చెప్పే వరకు వేచి ఉండకుండా, తమ మనసుకు ఏది సరైనదని అనిపిస్తే అది చేయాలని సూచించారు.